無綫劇集《潮流教主》熱播,劇中大批女演員日日都「扮到隻雀」咁,形象亮麗似足出騷,有網民「睇到厭」,即刻搜羅各位女主角嘅日常素顏照,雖然唔知啲相有冇執過,但overall嚟講都仲認到邊個打邊個嘅!

激讚李佳芯清純

首先有上位「奸後」李佳芯(Ali),近排佢擔正嘅機會愈嚟愈多,雖然最近佢日拍夜拍搞到電力跌曬wat,但網民見到佢張大頭素顏相都讚佢有氣質之餘仲相當清純,一啲都唔似已經33歲,同劇中多位青春派嘅女演員好似25歲嘅蔡思貝(Sisley)、26歲嘅陳瀅(Jeannie)有得揮,仲話「你話Ali係Sisley細妹我都信呀」!

李璧琦執相衰多手

而講到Sisley,佢亦都冇得倖免,被網民搵到佢張素顏相,不過一向運動形嘅Sisley擁一身健康膚色,而平時亦都冇乜化濃妝,所以素顏冇乜「睇頭」!而新一代女神Jeannie素顏亦靚到爆,雙眼炯炯有神,難怪大批宅男都畀佢電暈!另外,已為人妻嘅李亞男、呂慧儀亦都大獲好評,相反「負評」較多嘅則係31歲嘅楊秀惠,有網民話佢妝前妝後反差甚大,而且因為皮膚較暗啞,望落好似冇乜精神咁,亦有啲「老顏」感覺,叫佢唔好捱夜捱咁多。而37歲嘅「聲樂女星」李璧琦(Becky)就衰多手執相執得太勁,被網民譏笑似「ET」!

網民有話兒:

LeslieXXXXXX:蔡思貝素顏真係好似「達哥」,李亞男個樣好得,仲後生咗好多,王祖藍前世拯救咗地球?

趁早XX:佢哋好似有畫眼線,啲相又「柔化」咗,好似得邵佩(珮)詩真係稱得上係素顏喎!

明月XXX:得罪講句楊秀惠好似村姑,所以幾時都話人靠衣裝,女人真係好識用化妝品「喬裝」。

永恆XX:湯洛雯、陳瀅同Ali都好正!

HarryXXXXX:許亦妮張相好似「膠膠哋」,但見過佢真人幾OK。


李佳芯被讚清純有氣質。


莊思敏都唔差。


有網民話湯洛雯好正!


新一代女神Jeannie素顏梗係靚到爆!


雖然有網民話許亦妮張相「膠膠哋」,但亦話佢真人係唔差架!


有網民話邵珮詩先稱得上係真.素顏。


李亞男仲勁,素顏後生咗,不得了!


已經係人母嘅呂慧儀,素顏都幾掂。


楊秀惠被指有「老顏」感覺。


蔡思貝素顏被批冇睇頭。


李璧琦衰多手執相,搞到網民話佢似「ET」!