今日係嘉欣BB(鍾嘉欣)喺溫哥華補擺喜酒嘅大日子,又多一個無綫一線花旦升格做人妻,唔少港男應該喊到振作唔到!而同樣曾經為無綫一線花旦嘅胡杏兒亦剛剛結婚不久,有網民就發覺兩位女神都有一個相似嘅地方,就係兩位同樣都曾經有個拍拖多年嘅圈內男友,最後都分手收場,而兩位之後都閃嫁圈外人!真係估佢哋唔到,不過真愛呢啲嘢,外人識咩呀!


杏兒千萬出嫁


行頭仲超勁!


有大批兄弟姊妹團!


睇嚇杏兒粒鑽戒,閃到呢!個樣仲好冧添!

雖然兩位嘅處境有啲似,不過結婚嘅模式就相當大分別喇!唔知大家仲記唔記得胡杏兒大婚當日,出動大批兄弟姊妹團,老公李承德(Philip)更動用9架名車,包括勞斯萊斯、法拉利同保時捷等接新娘,氣派十足!而胡杏兒就以一身華麗嘅裙褂出場,據知呢條裙褂係用手工3D立體龍鳳刺繡,需要師傅一針一線,用咗近一年時間製成,冇錯,係一年呀!要刺足一年先收得工,問你服未!未完,之後杏兒喺Instagram上載咗一張戴住近20隻龍鳳鈪、大金豬頸鏈、金戒指及金耳環等等嘅相,真係富貴逼人!


嘉欣簡單甜蜜


處女黨出動做姊妹。


有慳妹之稱嘅嘉欣BB,結婚以簡單為主。


唔使著誇張嘅婚紗都好靚!

而相比起胡杏兒嘅千萬婚禮,鍾嘉欣就簡單得多!雖然嘉欣BB嘅老公Jeremy年賺五百幾萬港幣,不過一向有慳妹之稱嘅嘉欣BB就相當低調。身上嘅行頭超簡單,求婚戒指亦只係一卡左右,至於用嚟曬冷嘅龍鳳鈪,嘉欣亦只有一千零一對,另加一條好幼好幼嘅金鈪,行頭簡單到你唔信!所以話嫁得好唔代表要嫁得豪!睇見嘉欣BB望住老公Jeremy個冧樣,就知佢有幾幸福啦!各位港女,學嘢啦!


你哋睇嚇嘉欣BB幾開心!


冧到呢!真係嫁得好唔代表要嫁得豪嘅!

網民有話兒:

Katx0129:鍾嘉欣自己都搵唔少啦,洗(使)貪佢老公啲錢咩...

Sharxx23:嘉欣bb果然係娛樂圈嘅清泉,又唔拜金個人又有學識又靚女!

Chxxhoxg:兩個都好幸福,希望兩個都嫁得好!

CalvxxLxx:胡杏兒同Bosco拍咗咁多年都結唔成婚,鍾嘉欣同伍允龍又係,點知分左(咗)手就同第二個閃婚,所以話有d(啲)嘢唔係你嘅就唔係你,話知你拍咗幾多年。

Sunnx1219:嘉欣杏兒都要幸福喔!