近年,有唔少非韓籍嘅少男少女相繼喺韓國出道,Twice入面嘅台籍成員周子瑜,絕對係最為人熟悉嘅一個。最近就有位土生土長嘅香港人,隻身前往韓國發展,更加即將有新歌派台㖭!佢係邊個?之唔係曾經喺TVB做過童星嘅莊錠欣(ELKIE)囉。


▲CLC過去一直以5人組合示人,如今重組將會多加兩人,莊錠欣係其中一位。

出道一年嘅女團《CLC》今日宣布,來自香港、只有17歲嘅莊錠欣正式加入團隊,係繼泰國成員SORN之後的第二位外籍成員。ELKIE曾經以童星身份參與過唔少TVB劇集,包括《怒火街頭》、《好心作怪》、《仁心解碼》、《老表,你好HEA!》等等,而最為人熟悉相信係《On Call36小時2》入面,飾演吳啟華嘅患病女兒孫希欣,戲份都算多㗎。(出現集數:第1-5,11,12,14-16,18-27,29集)唔知呢一刻你又有冇啲印象呢?


▲雖然唔算每一個角色都係重要,但出鏡機會甚多。


▲《On call 36小時2》入面飾演吳啟華個女。


▲ELKIE曾經係家燕媽媽藝術中心旗下少女組合Honey Bees成員。

其實早前CLC已經賣關子會有新成員加入,只係估唔到新成員原來係香港人。如今CLC將以7位成員示人,下周一推出重組後首張迷你專輯《REFRESH》。而CLC所屬公司CUBE,旗下藝人有男團BEAST、BTOB及以泫雅為首嘅女團4minute,咁咪即係泫雅師妹?

睇片呢度↓

來源:CLC.UnitedCube

https://www.facebook.com/CLC.UnitedCube