講起做Group Project,好多人都會遇到一啲奇人異士,以下係我聽過嘅幾種:

1.大組長 - 可能天生比較有鍾意做領袖嘅傾向,一開波就會以leader嘅姿態控製住成個flow,如果真係有料嘅都還好,遇著個冇乜料又鍾意扮大佬嘅就真係會想叫佢收皮。

2. 藉口王 - 每次要開會/出嚟做嘢/交貨佢都會有千萬種藉口遲到or唔到,諸如屋企有急事朋友失戀行路仆親尋晚失眠扶緊幾百個呀婆過馬路等等等等......

3. 創意王 - 你叫佢做嘢,佢會做,不過交出嚟啲貨真係令你嚇一跳然後得啖笑,佢嘅idea總係出眾新奇前無古人後無來者,幫佢執仲耐過你自己做......

4. 偏執狂 - 呢類人對於文件/powerpoint嘅整齊性及美感有非一般嘅執著,邊行字多咗個space,邊張slide啲字偏咗1mm,佢一眼就望得出,於是執份嘢就會執到佢嘔血......

5. 潛水員 - 由始至終佢都係一名失蹤人士,直至最後要交組員名單嗰時,佢先會悄悄地由深海浮返上嚟畀佢個名同學生編號你......

6. 蘇軾(so-sick) - 睇佢平日好地地,一要做嘢就會忽然百病纏身,搞到你都唔好意思chur佢,但deadline後你就會見到佢生龍活虎咁出嚟跳跳彈彈,生理構造相當匪夷所思

7. 苦命人 - 我諗已經唔駛多講......唉,一世人流流長......辛苦你了(拍肩)

大家又遇過點樣嘅組員呢?